home
Total Visiters: 
കറുത്ത കര്‍ക്കടകത്തിന് വിട;പൊന്നിന്‍ ചിങ്ങം പിറന്നു
3 years ago ..
കാലിക്കടവ് : മാരിപെയ്യുന്ന കള്ളക്കര്‍ക്കടകത്തിന് അറുതിയുമായി പൊന്നിന്‍ ചിങ്ങം വന്നെത്തി. മലയാളത്തിന്റെ വസന്തകാലമാണ് ചിങ്ങം. സമൃദ്ധിയുടെ പോന്നോണത്തെ വരവേല്‍ക്കാന്‍ നാടോരുങ്ങുകയാണ്. ഞായറാഴ്ച ചിങ്ങം ഒന്ന് . ഐശ്വര്യത്തിന്റെ നിറ സമൃദ്ധിയുമായി വീണ്ടുമൊരാവണിപ്പുലരി കൂടി. സംസ്കൃതത്തില്‍ ശ്രാവണമെന്നും തമിഴില്‍ ആവണിയെന്നും വിളിക്കുന്ന ചിങ്ങം മലയാളത്തിന്‍റെ വസന്തകാലമാണ്. ഒരാണ്ടത്തെ ദുരിതത്തെ തൂത്തെറിഞ്ഞ് ഐശ്വര്യത്തെ വരവേല്‍ക്കുകയാണ് ചിങ്ങപ്പുലരിയിലൂടെ.ഓണത്തിന്‍റെ സാന്നിധ്യം കൊണ്ടാണ് ചിങ്ങം പ്രാധാന്യമര്‍ഹിക്കുന്നത്‌., ഓണം വന്നാല്‍ പ്രകൃതിയിലറിയാം.പാടങ്ങളില്‍ വിളഞ്ഞു നില്‍ക്കുന്ന നെല്‍ക്കതിര്‍,പറമ്പുകളില്‍ തുമ്പയും,മുക്കുറ്റിയും തൊട്ടാവാടിയും. ചിങ്ങം ഒന്ന് മുതല്‍ മുറ്റത്ത് പൂക്കളമിട്ടുതുടങ്ങും.തുമ്പപ്പൂവിനാണ് പൂക്കളത്തില്‍ പ്രാധാന്യം എന്നത് കൊണ്ട് തന്നെ തുമ്പത്തലപ്പുകളില്‍ പൂക്കള്‍ തേടി നടക്കുന്ന ബാല്യങ്ങളെ ഇപ്പോഴും ഗ്രാമങ്ങളില്‍ കാണാം. പ്ലാവില കൊണ്ടും, താളില കൊണ്ടുമെല്ലാം ഉണ്ടാക്കുന്ന കോട്ടാളകളിലാണ് കുട്ടികള്‍ പൂക്കളിറുക്കുന്നത് . എല്ലാം കൊണ്ടും സന്തോഷക്കാഴ്ചകള്‍ നിറയുന്ന കാലമാണ് ചിങ്ങം .കാലമാറ്റത്തില്‍ വയലുകള്‍ കെട്ടിടങ്ങള്‍ക്ക് വഴിമാറിയപ്പോള്‍ ഓണം വിളവെടുപ്പ് ഉത്സവമെന്ന സങ്കല്പം മാത്രം ബാക്കിയാവുകയാണ്. മറുനാട്ടില്‍ നിന്നുള്ള ഉത്പന്നങ്ങള്‍ കൊണ്ട് ഓണസദ്യയൊരുക്കുന്ന വിപണിയുടെ ഉത്സവം മാത്രമായി ഓണം മാറുകയാണെന്ന വേദനയും ഒരു വശത്ത്‌ നിറയുന്നു. എന്ത് തന്നെയായാലും പ്രതീക്ഷയുടെ പൂക്കാലവും കൊണ്ട് പടികടന്നെത്തുന്ന ചിങ്ങത്തെ മലയാളികള്‍ സന്തോഷത്തോടെ വരവേല്‍ക്കുന്നു.വൈവിധ്യമാര്‍ന്ന പരിപാടികളുമായി ഓണാഘോഷത്തിന് നാട് ഒരുങ്ങുകയാണ്.
No Comments
Name:         
Mobile no:   
Male   Female
Email:        ;
Comments here..

.. ..